50 Jier Frysk Oekumenysk Wurkferbân Hjerbeam.

 Fyftich jier lyn, dus yn 1975, is it Frysk Oekumenysk Wurkferbân Hjerbeam oprjochte en binne de tsjerketsjinsten yn it Frysk yn de Niklaastsjerke fan Hjerbeam begûn.

Yn 1975 stie it faai mei de tsjerke fan Hjerbeam. It wie doe in Herfoarme tsjerke, mar it tal besikers wie lyts, de tsjerkerie ek krap en problematysk de preek foarsjenning. Earder wie al besocht om gear te wurkjen mei omlizzende tsjerken, mar dat slagge net. Der wie in oerienkomst mei de Herfoarme Tsjerke fan Frjentsjer dat de Frjentsjerter dumnys ek yn Hjerbeam de tsjinsten ynfolden, mar dat wie fan beide kanten muoisum. De tsjerkerie fan Hjerbeam frege him ôf moatte wy net ophâlde mei de tsjinsten yn Hjerbeam en de tsjerke slute, sa troch gean kin net. Mar dat hold wol yn dat it hert yn Hjerbeam de tsjerke en it tsjerkhôf ferlen giene en wat moat der dan mei dien wurde. Fertuteazje en miskien slope? Ferkeapje en wêrfoar? Net sa maklik mei it tsjerkhôf der omhinne.

Yn in Fryske tsjinst op 12-1-1975 – doe noch net sa gongber – mei as foargonger Dumny P.P. Miedema fan Jorwert wie der nei ôfrin in petear oer de driigjende sluting fan de tsjerke. Mar dat hoecht dochs net dat de ienige tsjerke fan Hjerbeam ticht giet? Hjir wenje twa hûndert minsken, dat is mear as genôch om troch te setten, allinnich op in oare wize as dat oant no ta gien is. Hwerom net besykje en meitsje hjir in mienskipstsjerke fan? Op 23-1-1975 komme de tsjerkerieden fan Frjentsjer en Hjerbeam ta de konkluzje dat de beide Frjentsjerter dumnys net mear as twa fan de fjouwer tsjinsten yn Hjerbeam fersoargje kinne. Op 29-1-1975 komt der tsjerkerie fan Hjerbeam mei as gasten de dumnys P.P. Miedema en C. Nieboer fan Wommels, foarsitter fan it Frysk Oekumenysk Wurkferbân, in ûnderdiel fan de Fryske Rie fan tsjerken, by elkoar en wurdt it foarstel fan dûmny Miedema om om ‘e oare wike in oekumenyske tsjinst te hâlden en dat yn it Frysk, oannommen. Op 19 maart 1975 is der in gearkomste yn de Niklaastsjerke mei as tema: Ien Tsjerke en Ien Folk. Der is in yngripend petear en it makket hiel wat los en men wol de mooglikheden yn Hjerbeam stal jaan. Op snein 6 april 1975 is de earste Frysk Oekumenyske tsjinst yn Hjerbeam. In preek oer de wurden út it Johannes evangelie “Ik bin de opstanning en it libben”.  De rol fan de Gemeente fan Kristus, in rol fan en foar it hiele folk, in thús foar widdo en wees en in skûlplak foar wa’t op de flecht is foar de wrâld en foar it libben.

Dit wie it begjin fan it FOWHjerbeam. Earst as in proef fan ien jier, mar it is der noch altiten sa. Dit wurdt ek wol it wûnder fan Hjerbeam neamd.

Yn de rin fan dy 50 jier is der hiel wat dien. De tsjerke is ûnderholden en de ferkundiging fan it Wurd is troch gien, der binne aksjes west foar in klok, in oargel, de spits en dat mei help fan de minsken yn Hjerbeam. Wat as dat net dien wie, wie de tsjerke dan miskien sloopt sa as mei it doarpshûs bard is en feroare yn in keal gêrs field mei in tsjerkhôf ? Wy as kommisje moatte dêr net oan tinke. Wy binne dan ek de minsken dy it destiids oandoarden en de skouders der ûnder setten hawwe dankber! Dat jild ek foar al dy kommisjeleden fan it FOWH yn de rin van de tiid en de help fan in protte frijwilligers en trouwe besikers fan de tsjinsten! Snein 30 maart oan steande wolle wy yn in tsjinst sa dy gebrûklik is betinke dat it FOWHjerbeam 50 jier bestiet. In danktsjinst mei it koar Om ‘e Nocht út Wâldsein dat 50 jier lyn ek songen hat yn de tsjerke. De tsjinst begjint om – ek gebrûklik – 09.30 oere en foargonger is dan Dumny  S. Ypma fan Frjentsjer. Sa as altitel in elk is wolkom !

No noch efkes oer de takomst. Yn de kommisje tinke wy dat wy wer op in punt stean dat der wat barre moat. Dat wy mear iepen stean moatte foar de mienskip yn it algemien en foar de ynwenners fan Hjerbeam en omjouwing yn it bysûnder. Elk is altiten wolkom en de drompel moat leech wêze. Der is net sa folle mear yn Hjerbeam en de tsjerke moat dochs stean bliuwe en …… brûkt wurde. Dus iepen stelle foar mear gebrûk en oanpasse. Wy stean dêr foar iepen, mar hawwe dan wol help nedich út it doarp. Dat wie al sa mei de kryst it ôfrûne jier, wat toch prachtich wie mei de jongerein fan Hjerbeam en de gearwurking met it Doarpsbelang ! No sa fierder tinke wy.

De Kommisje FOWHjerbeamn, Joke Hoekstra-Tuinstra, foarsitter, Hidde Frankena, skriuwer, Alte Lourenz, ponghâlder, Jan de Haan, Ant Palma-Hellema, Ackelien v.d.Pol-Zijlstra en Appie Reitsma.